menu secteurs

print
print rss
Crear una escòla > Cap a la dobertura

menu secteur

Crear una associacion prefigurativa per endralhar lo projècte de dobertura d’una escòla novèla

Se trapar a qualques familhas que partejan lo desir de crear una Calandreta. Aquesta etapa es importanta que lo projècte pòt pas èsser portat per una persona sola e lo nucli inicial se deu d’èsser clar sul projècte.

Se metre en ligason amb la federacion regionala competenta. Es lo biais melhor de conéisser lo projècte Calandreta e de reçaupre los primièrs conselhs respècte al projècte de creacion. Es enfin prene data al prèp del movement e començar de soscar als mejans de sa realizacion.

Totjorn en ligam amb la federacion regionala, far subrondar, conéisser la demanda sociala, saupre se la zòna d’implantacion de l’escòla futura es en creissença demografica. De qu’es de la populacion escolara ? D’escòlas publicas an barrat ? Lo movement occitan es ja representat ? La lenga es encara presenta ?...

La conclusion d’aquesta primièra fasa es la constitucion d’una associacion prefigurativa e la demanda d’agrat Calandreta.

L’associacion prefigurativa rescontra lo conse de la comuna ; se trapa un local per l’escòla

Qué son las condicions per un local d’escòla ? Lo bastiment deu aver pro de plaça (60m2 per classa, dormida, sala de restauracion, pati de recreança, burèu...)

L’associacion prefigurativa cèrca son futur regent amb l’ajuda de la Federacion Regionala e de l’establiment d’ensenhament superior occitan APRENE : qualqu’un de la comuna que parle occitan e qu’aja las condicions de diplòma. Es bravament melhor de trapar un regent de la comuna que conesca mond e que pòsca animar un ret relacional de proximitat per far conéisser la dobertura de l’escòla.

L’associacion a un local, un regent e de calandrons, pòt DECLARAR la dobertura de son escòla.

En França, l’Estat a lo monopòli de l’ensenhament dins lo respècte de la libertat dels ciutadans. Las escòlas publicas son sota son contraròtle dirècte. Las autras son obligadas de se declarar e l’Estat i pòt contrarotlar la seguretat e l’igièna, la moralitat dels regents, e verificar que l’escòla pausa pas de problèma a l’òrdre public. Dempuèi la lei del 18 XII 1998, l’Estat i pòt venir avalorar tanben las competéncias aquesidas pels mainatges

Confederacion Calandreta. Ensenhament laïc immersiu occitan
Ostal d’Occitània . Espaci Jaume 1èr d’Aragon . 117 carrièra dels Estats Generals . 34000 MONTPELHIÈR . tel : 04 67 06 81 10
coordinatritz(at)calandreta.org - de remplaçar/remplacer (at) per/par @
La Confederacion Calandreta es afiliada a
l’ISLRF, l’Institut Supérieur des Langues de la République Française
logo de l'ISLRF
Mencions legalas