Calandreta s’es associada tre la debuta au collectiu « Per que visquen nòstras lengas »
que recampa totas las lengas regionalas de França. Aqueste recampament es una primièira.
Se farguèt a l’iniciativa dau deputat Paul Molac et de François Alfonsi deputat europenc, per organisar una reaccion a l’accion marridassa dau sinistre Blanquer. Totes s’acordan per dire qu’es un linguicidi.
La manifestacion dau 30 de novembre a Paris es estada una capitada d’autant mai estent las condicions ultra rapidas de son organisacion.
Una delegacion fuguèt recebuda pel cabinet dau ministre e se son engajats de contunhar una concertacion.
Per qu’aquò sià vertadièr e seguit de resultas cal absoludament contunhar de faire pression sul ministèri.
Per aquò se decidiguèt de manifestar lo 4 d’abriu dabans los rectorats. Nos cal nos organisar.
Sabèm que lo 4 d’abriu es lo primièr jorn das vacanças pels rectorats de Montpelhièr e Tolosa.
La debuta das vacanças pòt pas estre una empacha mas au contre una ajuda. Auran mai que lo dimenche per se remetre.
Calandreta es concernida pel desastre dau segondari public. E tanben Calandreta patis amb aqueste ministèri que per ongan avèm gaireben pas aguts de pòstes novèls.
Contunhar atal serià fatal.
Lo 4 d’abriu vos cal venir totes amb los dròlles e los papetas.
Manifestarem contra lo glifosate Blanquer das lengas regionalas.
Per aquò portarem de pòts amb de flors per representar la riquesa colorada, diversa e fragila que son las nòstras lengas.