Una novèla escòla occitana ven de dobrir

Autour de Manon, enseignante en occitan, les jeunes élèves de la Calandreta./Photo DDM.

A l’entorn de Manon, ensenhaira, los joves escolans de la Calandreta./fòto DDM.

Nòu escolans vènon d’integrar una tota novèla escòla mairala bilingüa, laíca e associativa, la Calandreta deth Coserans. Al 36, avenguda Gallieni, Manon, l’ensenhaira acuèlha los calandrons. Lo planpè d’aqueste ostal, amb una sala de classa, una sala de dormida e un jardin dels bèls per las recreanças, foguèt entierament alestit pels parents pendent l’estiu. L’escòla es afiliada a la federacion Calandreta de Miègjorn-Pirenèus que compta mai d’un vintenat d’establiments sul territòri. Aquesta mèna d’establiment utiliza lo metòde de l’immersion lingüistica tre la mairala per fin de valorizar e de desenvolopar las capacitats d’enfants joves-joves a aquesir una segonda lenga e a mestrejar doas lengas d’un biais equivalent.

Rendètz-vos dissabte per l’inauguracion

Las Calandretas s’inspiran de las tecnicas Freinet e de la pedagogia institucionala, balhar a paraula a l’enfant, lo menar a l’autonomia, favorizar la vida de grop. Utiliza d’aisinas pedagogicas que van dins aqueste sens : lo Conselh, lo Qué de nòu, la correspondància escolara, lo trabalh cooperatiu, l’autoavaloracion.

Julien, lo paire de Ninon, es encantat de la dobertura de la Calandreta : «Fa mai d’un an qu’avèm començada aquesta aventura associativa. Lo jorn de la dintrada es un bèl abotiment per nòstres enfants ! Mas l’aventura fa pas que començar e se perseguirà l’annada tota, al quotidian. Nos cal organizar d’eveniments que permetràn de finançar e far viure la Calandreta.»

Los parents mercèjan los donators que permetèron a la Calandreta de San Girons de se lançar. De mai es totjorn possible de sosténer aqueste projècte en far un don. La volontat de l’escòla es de far viure la lenga d’òc e de promòure la cultura occitana sul territòri. L’inauguracion de l’escòla, festiva, en musica, se debanarà dissabte.

Contact : Calandreta deth Coserans, 36, avenue Gallieni à Saint-Girons ; calandreta.deth.coserans@gmail.com ; Tél. 06 43 52 80 56 ; occitan-couserans.jimdo.com

Revirada de l’article del 06/09/2016 de La Dépêche du Midi.