Dobèrta en 2015 l’escòla immersiva en occitan de Lavaudieu aculhís 16 escolans

2899011Escolans, professors e parents s’acampèron dimarç passat pel gostar de la dintrada, dins los locals de l’anciana e novèla escòla de Lavaudieu (uèi logada a de particulars).

L’aventura comencèt en Briudés en setembre de 2015. Un an mai tard, l’escòla immersiva en occitan de Lavaudieu compta 16 escolans. Dimarç, parents e escolans s’acampèron a l’ora del gostar.

Dins lo vilatge de Lavaudieu s’ausisson de crits d’enfants coma los autres. Mas lor escòla (e la lenga que parlan) es, fòra de comun.

Cinc escolans de mai

Creada per l’associacion Calandreta Ribeirona, quitament nascuda en 2013, es una escòla laíca associativa immersiva en occitan. E la formula fonciona. Per aquesta dintrada, comptan cinc escolans de mai, çò que pòrta lo nombre d’escolans a 16. Vènon de Lavaudieu, Briude, Paulhac, Autrac… « L’objectiu es d’arribar a 20 escolans » precisa Thomas Ganlut, membre de l’associacion Calandreta Ribeirona. Los escolans son dins una classa multinivèls, enquadrats per la regenta Isabèla Peatier, l’ajuda Anne-Lucie Huchet e tanben un servici civic.

Calandreta existís dempuèi trente ans e compta 65 escòlas, que 3 se trapan en Auvèrnhe (amb Puèi de Velai e Orlhac). « Es reconeguda per l’Educacion Nacionala e seguís son programa, explica Thomas Ganlut. Mas cal esperar cinc ans per obténer la contractualizacion de la classa e doncas lo finançament del salari de l’ensenhaire per l’Estat ». Per l’ora, son los eveniments organizats per l’associacion culturala e los parents que finançan l’escòla. « Èsser dins l’escòla demanda un engatjament dels bèls dels parents. »

En mai de l’ensenhament en lenga occitana, l’escòla aplica las tecnicas Freinet e Oury. Un aprendissatge en immersion e per l’experimentacion qu’agradèt a Gérard Barriol, vengut de Champanhac. Son filh de 5 ans, Leonard, arribèt ongan a l’escòla. « Çò que nos balhèt enveja, es lo sistèma educatiu que respècta lo ritme de cada enfant. L’estructura de la Calandreta revertava nòstra vision de l’educacion. »

En mai de la Calandreta, l’associacion Calandreta Ribeirona organiza tanben de gostarsÒc doberts al public, una dictada, un balèti/concèrt, un festenal de l’enfança…

D’aprèp Lydia Berthomieu