Espectacle magnific de las escòlas calandreta De Ciutat, Pèch Mary e La Rosèla sus la scèna del teatre de Carcassona

« Dins los passes de Pèire Pos »

Lo dimars 14 de mars passat, al teatre Jean Alary, las escòlas Calandreta de Carcassona e Viladubèrta presentèron davant mai de 550 espectadors lor espectacle Dins los passes de Pèire Pos.

Dins los passes de Pèire Pos

Aquesta representacion fasiá seguida a la classa vèrda organizada l’an passat en País de Sault. Los enfants èran partits al rescontre de la natura mas tanben del formidable contaire Pèire Pos mercé, entre autres, a l’intervencion de Pèire Brun. Lo contaire mitic del País de Sault aviá atal aculhit dins son ostal un grop de calandrons per un escambi de contes al canton de la chiminièra.

L1370668 (Copier)

La lenga occitana passèt de boca a aurelhas e aqueste escambi faguèt créisser en çò dels mai joves l’enveja de venir contaire a son torn.

Es exactament çò que mostrèron sus l’empont en encadenant cinc tablèus. Lo lop, la mandra, los gigants, la bèstia de sèt caps e l’ors balhèron l’escasença a totes los actors de metre en scèna de contes de Pèire Pos.

Emai los enfants aguèron drech a una suspresa de darrièra minuta en veire arribar al teatre lo quite Pèire Pos ! Aqueste d’aquí, que celebrarà dins qualques jorns sos 88 ans, daissa rarament lo País de Sault e, el tanben, foguèt suspres de veire la granda consideracion que la sala li manifestèt.

Pierre Pous théâtre J Alary

Aqueste espectacle marca un temps fòrt per las escòlas Calandreta que pòrtan la cultura e la lenga occitana amb tant de fervor coma l’ensenhament. Las còlas pedagogica e associativa Calandreta mercèjan en particulièr la còla del téatre Jean Alary e tanben l’escòla Berthelot e la Calandreta de Peiriac qu’avián causit de menar sos escolans a l’espectacle.

Revirat d’aprèp l’article de Jean-François Albert.