Reportatge sus Calandreta

Cossí fonciona una calandreta ?

La primièra escòla immersiva calandreta nasquèt en genièr de 1980 a Pau. Uèi, son 65 escòlas e 3 collègis ont l’occitan es lenga d’ensenhament.

Los 3797 calandrons escolarizats ongan l’aprenguèron en immersion, amb la pedagogia Freinet entre autras.

A gaireben 40 ans, lo movement Calandreta es vengut un actor màger del païsatge occitan. Tot lo mond a ausit parlar d’aquestas escòlas restacadas al Ministèri de l’Educacion Nacionala. Mas qual las conéis vertadièrament ?

Calandreta, emplegaire occitan màger

L’er d’i pas tocar, l’estructura Calandreta emplega 532 personas que 216 son ensenhaires, la màger part pagada per l’Estat aprèp la contractualizacion de l’escòla. Sus la sola acadèmia de Montpelhièr, Calandreta compta 110 professors.

Calandreta, es tanben l’ISLRF (Institut Superior de las lengas de la Republica Francesa) que forma los futurs professors de las escòlas immersivas, l’establiment d’ensenhament superior Aprene que li es afiliat, mas tanben lo CFPO (Centre de Formacion Professionala Occitan). Aquestes emplegats se vènon apondre a las 532 personas. Lo budgèt globla es de  17,4 M d’€.

Calandreta e sos etèrnes problèmas de locals.

Crear una calandreta, es totjorn complicat. Que cal trapar un local per aculhir los enfants, pagar un loguièr, o crompar un terren, bastir una escòla… Mas far viure e se desvolopar una Calandreta, es un vertadièr copa-cap. Dins 45% dels casses, Calandreta es proprietària, siá del terren, siá de l’escòla. Çò que, per son president Joan-Loís Blenet, es un fracàs.

Vaquí l’exemple de la Calandreta de Sijan, dins de locals vielhissents, menaçada mai d’un còp de barradura, e que se pòt pas desvolopar per manca de plaça.

Urosament, i a un projècte bèl a Pòrt-la-Novèla, dins un ancian mas qu’aparten al conservatòri del litoral…

Calandreta e la problematica del segondari

Lontemps, calandreta negligiguèt un pauc lo segondari, pensant que l’ensenhament public prendriá lo relai. Resultat : sonque 3 collègis e pas cap de licèu. 210 collegians repartits entre Montpelhièr, Pau e Tolosa.

I a doncas pas de cursus complet per l’occitan de la mairala a l’universitat. La presidenta de la Region Occitània, Carola Delga, s’es engatjada sus 2 licèus abans la fin de la mandatura : 1 a Tolosa e l’autre a Montpelhièr.

Dins l’espèra, calandreta cèrca tanben de locals pel collègi tolosan albergat per l’ora… dins una escòla publica primària !

D’aprèp los Reportatges de B. Roux J. Levé P. Barguisseau C. Willocq M.P. Fournier.

Publicat pel-blog-de-viure-al-pais-france3 le 27/03/2017.

Lo Benaset @Benoit1Roux