Un ministre e… dos presidents !

Dissabte 3 de junh, a l’escasença de son desplaçament a Biarritz pel congres de la FCPE, lo novèl Ministre de l’Educacion Nacionala, Jean-Michel BLANQUER, rescontrèt lo president de SEASKA e d’ESKOLIM, Paxkal INDO, e lo co-president de CALANDRETA e president de l’ISLRF, Joan-Lois BLENET.
Hervé COUTURE, director del CAPÒC participèt tanben a la reunion.

Photo rescontre ministre 2017 (2)
Jean-Michel BLANQUER, rescontrèt lo president de SEASKA e d’ESKOLIM, Paxkal INDO, e lo co-president de CALANDRETA e president de l’ISLRF, Joan-Lois BLENET.

Aqueste rescontre se faguèt mercé a la demanda dels elegits e particularament aquesta del President del Conselh Departamental, Jean-Jacques LASSERRE, e del Vici-Président Max BRISSON.

Aquò faguèt plan vèire au Ministre lo sosten politic sus la question de las lengas regionalas.

Amb las demandas particularas de l’immersion presentèrem la necessitat de donar un estatut a las lengas regionalas dins l’ensenhament que s’i trapan dins una situacion plan malaisida e doncas marrida.
Al contrari del francés, qu’es la lenga nacionala, e de las lengas estrangièras que son obligatòrias, las lengas regionalas, an pas d’estatut e demòran encara jos la règla del doble volontariat : lo de las familhas e lo dels emplegats del servici public. Pasmens las lengas regionalas son marcadas dins la Constitucion coma Patrimòni de França,

Presentèrem la demanda d’una Lèi o Reglamentacion per un ESTATUT DE LAS LENGAS REGIONALAS, amb qualques principis màgers :

1) La lenga regionala es lenga de drech dins tots los establiments de sa zòna de difusion (pas mai de vòtes de C.A o de professors per autorizar l’ensenhament de l’occitan, nimai de possibilitats d’embarràs o de refús dels inspectors ).

2) Pas de concuréncia amb las opcions e las lengas estrangièras : estudiar l’occitan deu pas demandar al jove un sacrifici educatiu.

3) l’Ensenhament se deu sempre dispensar pendent lo temps escolar.

4) Obligacion de seguit pedagogic.

5) Valorizacion al mens a egalitat amb las lengas ancianas.

Amb aquel estatut demandèrem una reconéissença mai formala qu’aquesta que coneissèm a l’ora d’ara, per las 5 rets laïcas d’ensenhament immersiu.

Lo Ministre diguèt son acòrdi sus la necessitat de servar la diversitat lingüistica e culturala.
Mostrèt un interes grand per l’experimentacion pedagogica e lo plurilingüisme que practicam.
Avèm constatat un esperit de dobertura e lo ligam es pres amb lo Ministre e son gabinet per faire avans per l’occitan e las lengas regionalas.

Joan-Loís Blenet, co-president de la Confederacion Calandreta