L’Union : la Calandreta es totjorn en cèrca de locals per la dintrada

Fòto L'Union
La Calandreta de l’Union deu daissar los locals municipals qu’an d’èsser renovats. / Fòto DDM archives

Punt mòrt. Lo problèma de locals viscut per la Calandreta de l’Union perdura. Lo rendetz-vos a la comuna de dijòus passat, per ensajar de trapar una solucion d’urgéncia a mens de doas setmanas de la dintrada, balhèt pas res. « Nos demandèron aqueste rendetz-vos, foguèt l’escasença de nos anonciar oficialament qu’avián pas de locals per la dintrada », explica David Rofé, adjonch a las finanças a la comuna de l’Union. « Ensagèrem de demandar un alongui fins a las vacanças de la Totsant o de Nadal », ditz Pauline Mothéron, parenta d’escolan inquièta.

520 escolans en Garona Nauta

La comuna refusèt, qu’un relambi d’una annada foguèt ja balhat e qu’avián de far d’òbras dins aquestes locals  « vetustes ». « Nos an quitament dich qu’èran comols d’amiant », apond Pauline Mothéron. La solucion prepausada per la comuna es d’escolarizar los tres escolans de l’Union dins l’escòla publica. « Los autres se pòdon adreçar a sa comuna, seràn forçadament acceptats », apond David Rofé. Una eissida qu’agrada pas al quinzenat de parents d’escolans concernits.

Aprèp un fum de sollicitacions prèp de la comunas vesinas, la Calandreta se trapa encara uèi per carrièra. « En 5 o 6 ans, es lo primièr còp qu’una Calandreta es dins aquesta situacion », afirma Gaëlle Pujol, coordinatritz de la Federacion Calandreta de Miègjorn-Pirenèus. En Garona Nauta son 520 escolans que son marcats dins aquestas escòlas jos contracte d’associacion e fòra contracte d’associacion. « Nòstre creis es constant mas la cèrca de locals representa un fren a la creacion de novèlas », conclutz la coordinatritz.

ANAÏS MUSTIERE

Adaptacion de l’article publicat dins La Dépêche lo 21/08/2017 : http://www.ladepeche.fr/article/2017/08/21/2631291-rentree-la-calandreta-recherche-toujours-des-locaux.html