AQUITÀNIA – SUPRESSION DELS CONTRACTES AJUDATS : mobilizacion dissabte 9 de setembre a Pau

Aficha CAE

Blocatge dels contractes ajudats, una dintrada del gost amar per Calandreta

Las escòlas Calandreta de Bearn poguèron pas renovelar e/o crear de pòstes d’ASEM dins l’encastre dels contractes ajudats. La casuda del taus de presa en carga per l’Estat (de 70 a 52%) en mars passat, augurava ja de las dificultats que caldriá susmontar. La decision de blocar lo recors als contractes ajudats, subta, fa pas que renfortir lo gost amar d’aquesta dintrada.

Lo recors als contractes ajudats, una necessitat

La mager part de las associacions Calandreta a besonh d’aquestes contractes per far virar las escòlas, vènon clarament portar remèdi a la manca d’investiment de l’Estat dins lo finançament de las escòlas. Quand las collectivitats s’engatjan al costat de Calandreta se pòt notar un recors mendre als contractes ajudats.

Calandreta sosten pas la precaritat inducha pel recors als emplecs ajudats, mas cal plan constatar que, quand lo finançament public d’associacions qu’asseguran una mission de servici public es pas pro naut, se pòt sonque virar cap a aquesta mena de dispositiu.

L’ensem del movement s’avisa de mai que los professionals benefiscan d’una experiéncia pedagogica reconeguda e d’una formacion lingüistica solida.

Escòlas privadas… òc, mas gratuitas !

Se pòt remandar Calandreta a son estatut d’escòla privada per justificar l’inutilitat d’ajuda d’Estat que qual ditz « escòla privada » ditz « escòla paganta ». Aqueste prejutjat se romp lo morre sus Calandreta. O rementam, nòstres escòlas e collègis son laícs e gratuits, doberts a totes e asseguran una dobla mission de servici public. Calandreta trai cap profiech financièr de l’escolarizacion dels escolans. Son foncionament s’apèva sus un investiment associatiu fòrt dels parents d’escolans.

Las consequéncias

La supression dels emplecs ajudats priva los escolans de mairala e sos ensenhaires del sosten preciós d’ASEM. Degun imaginariá de tornar metre en causa la pertinéncia d’aquestes emplecs dins la classa. Aquestas personas se pòdon pas reduire a un dispositiu « costós e ineficaç », son de malhons indispensables de l’acompanhament dels escolans dins nòstras escòlas.

La dindrada s’organiza cossí quicòm, aquí se suprimís las gardariás de fin de jornada, alà se fa apèl a de parents benevòls… mas aquestes « bricolatges » pòdon pas èsser que temporaris. Al delà de l’organizacion dels establiments, es a de detzenats de personas que calguèt anonciar subte que trabalharián pas pus o que demorarián suspendudas a una eventuala signatura de convencion.

Calandreta se pòt pas resignar a acceptar aquesta situacion.

L’apèl al governament e la mobilizacion

La federacion Calandreta dels Pirenèus Atlantics, e l’ensem de las escòlas immersivas, interpelèron lo govèrn, pel biais del Prefècte, per permetre a nòstres establiments, qu’asseguran una dobla mission de servici public, d’educacion (en contracte d’associacion amb l’Educacion Nacionala) e de transmission de las lengas regionalas, d’assegurar l’annada escolara presenta dins de condicions serenas.

Nos associam a las inquituds de l’ensem del sector non mercant tocat per la decision del govèrn, apelam a una  mobilizacion lo Dissabte 9 de setembre a 9h30 davant lo Parc de las Exposicions de Pau.