Calandreta Vilafranca de Lauragués : l’occitan, es pas sonque pels enfants !

I a de nòu del costat de la Calandreta, l’escòla immersiva en occitan, per aquesta dintrada de 2016. L’associacion a, entre autre, previst d’organizar des corses pel adults.

Los futurs bilingües occitan-francés an tornat prene lo camin de l’escòla.

Dijòus 1èr de setembre, la Calandreta de Lauragués, escòla associativa immersiva en occitan installada a Vilafranca de Lauragués, tornava dobrir sas pòrtas al 3 avenguda de Carcassona.

Ongan, 8 escolans aprofièchan dels corses dins lo prefabricat : dos en pichòta seccion, dos en mejana seccion e quatre en granda seccion (contra 6 escolans en tot la primièra annada). Per ara l’esòla pòt aculhir fins a 10 escolans.

( de legir tanben : À quoi ressemble la Calandreta ?)

Cal tanben soslinhar l’arribada d’una novèla ensenhaira, la renovacion de la cort de recreança d’ara en davant mai granda e la creacion d’una dintrada novèla.

Lèu un terren novèl per la Calandreta

Se las pòrtas de la Calandreta dobriguèron en debuta d’annada sul terren de l’avenguda de Carcassona, l’associacion a trapat un endrech novèl per installar son prefabricat. Pasmens, coma lo permes de bastir es pas encara valid, l’annada se debanarà dins los locals costumièrs. De mai las recèrcas s’arestaràn pas aquí.

« L’ideal seriá totjorn d’aver un bastiment «  en dur « », precisan Priscille Paccoud e Marlène Ratel, membres de l’associacion Calandreta de Lauragués. A l’ora d’ara, sabon pas encara quora la Calandreta se podrà installar dins de locals novèls.

De corses pels adults

Mas ongan çò de mai novèl es l’organizacion de corses per adults !

L’idèa venguèt pas de nautres, explica Priscille Paccoud. Al forum de las associacions de Vilafranca, nos es estat demandat mantuns còps se prepausàvem de corses pels adults e ongan, sèm capables d’o far qu’avèm dos benevòls que se ne pòdon cargar.

Aital, cada dimarç fòra vacanças escolaras e tre setembre, los corses se debanaràn de 20 h 30 à 21 h 30 dins la sala de l’anciana percepcion, placèta del general de Gaulle (a costat de la bibliotèca e en fàcia de la Pòsta).

I a ja qualques personas marcadas mas l’associacion pòt aculhir fins a 20 personas. La tarifa es de 90 euros l’annada, e 5 euros de mai d’inscripcion a l’associacion.

Infòs
Per se marcar als corses per adults : www.calandreta-du-lauragais.org o 06 68 54 55 77.

D’aprèp Florian Moutafian. Voix du Midi Laurageais. Publicat lo 17/09/2016.