Ensenhar a Calandreta

 

Volètz venir ensenhaire a Calandreta ?

Cada an, APRENE – Establiment d’ensenhament superior occitan – recruta mond que vòlon venir professors de las escòlas a Calandreta.

La formacion iniciala dels ensenhaires amb APRENE

APRENE ensenha la pedagogia de l’immersion lingüistica e prepausa una formacion complèta en tres annadas :

Examen d’entrada, la jurada » : http://www.aprene.org/fr/node/2668

La jurada es una avaloracion doberta a totes aqueles que desiran ensenhar dins una escòla Calandreta. Es l’examen de dintrada a APRENE.
Es pas un concors.
Los candidats acceptats a la jurada per una federacion regionala Calandreta vènon de « calandrins » e dintran en primièra annada.

Primièra annada : Aprene 1, annada preparatòria al mestièr. http://www.aprene.org/fr/node/2680 .

Sa validacion es indispensabla per ensenhar dins las escòlas Calandreta amb títol de « Regent o Regenta ». Sa tòca es de menar cada estudiant al nivèl de competéncia B2[1] en occitan e l’ajudar a se bastir una pedagogia adaptada[2].

Las escòlas Calandreta son d’escòlas bilingüas ont la lenga ensenhanta es l’occitan. Los enfants escolarizats a Calandreta son, en majoritat, eissits de fogals que la lenga mairala i es lo francés. Lo desfís prepausat als ensenhaires de Calandreta es de transmetre la lenga occitana d’un biais natural en prepausar l’immersion complèta a l’escòla. En mai de la lenga, transmèton tanben la cultura occitana.

A la fin de l’annada d’Aprene1, cada « calandrina » o « calandrin » aurà viscuda una annada d’immersion en occitan dins 4 escòlas Calandreta al mens : mantunas setmanas de vida de classa e d’escòla dins una tòca professionala.
Aurà rescontrat la realitat del movement associatiu Calandreta. Aurà apres a preparar la classa (fichas de preparacion, quasèrn de bòrd), a far una leiçon en saupre definir un objectiu, a avalorar los aquesits dels « calandrons » mercé a un dispositiu d’avaloracion formativa, a organizar un emplec de temps de classa, a organizar una sortida e metre en plaça un projècte pedagogic, a pensar sa classa amb las aisinas e las institucions adaptadas. Serà capable de portar la lenga occitana de contunh tant a l’oral coma a l’escrich.

[1] Nivèl definit pel Cadre Europèu Comun de Referéncia per las lengas.

[2] En referéncia a la Carta Calandreta adoptada lo 21 de mai de 2005 a Limós

[3] Estudiant en formacion a APRENE.
Segonda annada : APRENE 2, annada de mesa en pòste dins una classa Calandreta per una confirmacion de capacitat professionala. http://www.aprene.org/fr/node/2681

La competéncia de validacion del dispositiu es despartit entre APRENE e las Federacions Regionalas.

Sens la validacion d’aquesta annada Aprene 2, serà pas possible de perseguir lo cursus.

Las escòlas Calandreta, e sos usancièrs, enfants e parents, an besonh de regents formats a la pedagogia del bilingüisme per immersion, en aplicacion de la Carta Calandreta. Aprene i trabalha dempuèi mai de 20 ans, mercé a un cursus de formacion que comença per l’annada Aprene1.

MASTER Educacion Formacion APRENE / ISLRF (MEF) http://aprene.org/fr/node/108

Aquesta formacion, menada per APRENE e l’ISLRF, permetrà en doas annadas de completar e aprigondir la formacion pedagogica e lingüistica dels estudiants e de los preparar al concors del CRPE.

Professors d’escòlas estagiaris http://aprene.org/fr/node/103

Los qu’an capitat la session del concors privat extèrn lenga regionala son marcats en Master 2 MEF dins un establiment d’ensenhament superior privat qu’a signat una convencion amb un ESPE.

Los qu’an capitat e que son ja titularis d’un Master 2  beneficiaràn d’un percors de formacion adaptat dins lo quite establiment d’ensenhament superior privat.

Concors de recrutament de professors d’escòlas
Concors extèrn especial ISLRF
Lenga regionalahttp://www.aprene.org/fr/node/105

 

APRENE– Establiment d’ensenhament superior occitan
Ostal de la vida associativa . n°116
15 carrièra del general Margueritte . 34500 Besièrs
tel : 04 67 28 75 36 – fax :04 67 28 75 39