Organizacion

Lo Movement Calandreta :

Organigrama

Per lo telecargar en version pdf, clicatz sus lo ligam : http://calandreta.org/wp-content/uploads/2016/04/Organigramme-Movement-Calandreta.pdf

 

Organigramme Movement Calandreta-page-001

Las associacions gestionàrias d’establiments (escòlas e collègis)

Cada establiment Calandreta es gerit per una associacion que son objècte es :
– d’escolarizar en immersion lingüistica occitana aboriva,
– de formar d’enfants bilingües que mestrejan perfiechament l’occitan e lo francés en fin de primari (introduccion progressiva del francés pendent lo cicle elementari).

Son conselh d’administracion (parents elegits pendent l’amassada generala) :
– assegura lo foncionament e la gestion de l’establiment en conformitat amb los estatuts e la Carta Calandreta,
– recruta lo personal non ensenhaire (ASEMs, animators, secretaris(rias), agents…),
– gerís las abséncias del personal ensenhaire amb l’ajuda de la federacion regionala,
– gerís las negociacions e los contactes amb las collectivitats localas (comunas), en relacion amb la còla pedagogica de l’escòla representada coma se deu a cada acamp del conselh d’administracion.

Las Federacions departamentalas

Las federacions departamentalas :
– Sostenon los projèctes educatius e d’instruccion bilingüa en occitan e francés dels establiments primaris e segondaris Calandreta del departament.
– Sostenon los projèctes pedagogics e culturals dels establiments.
– Gerisson las negociacions amb los Conselhs departamentals.

Las Federacions regionalas

Aquitània, Auvèrnhe-Velai, Lengadòc, Lemosin e Miègjorn-Pirenèus son las 6 federacions regionalas que :

– Coordinan las associacions Calandreta e las federacions departamentalas de son canton.
– Gerisson lo movement dels ensenhaires.
– Co-finançan, amb los establiments, los pòstes d’ensenhaires fòra contracte.
– Sostenon los establiments Calandreta de sos departaments dins lor gestion, lor administracion e lor comunicacion.
– Acompanhan lo desvolopament e la creacion d’establiments novèls (son las protagonistas de la creacion d’escòlas novèlas qu’inícian la creacion d’associacions prefigurativas).
– Gerisson las negociacions amb lo Conselh Regional de lor territòri.

Los territòris de las federacions Calandreta dichas « regionalas » o « departamentalas » son definidas per Calandreta e seguisson pas forçadament lo decopatge administratiu.

La Confederacion Calandreta-Ensenhament laíc immersiu occitanchapeau_mvt_cal_fr

La Confederacion Calandreta – Ensenhament laíc immersiu occitan a per objècte de sosténer e promòure la lenga e la cultura occitanas mercé a l’accion dels establiments Calandreta, establiments d’ensenhament laíc e gratuit que bastisson lo bilingüisme occitan-francés per immersion en referéncia a la Carta dicha « Carta Calandreta ».

La confederacion assegura la coordinacion de l’ensem de las estructuras Calandreta, la coesion del movement e la conformitat dels establiments a la Carta.

Los mejans d’accion de la confederacion son, entre autres, l’organizacion e la gestion d’establiments escolars e para-escolars, l’edicion de libres e publicacions, l’organizacion de mòstras, de congrèsses, de conferéncias e espectacles, la formacion…

La Confederacion Calandreta es mandatada per las associacions localas Calandreta gestionàrias d’establiments e sas federacions, per èsser son representant coma interlocutor e partenari dels poders publics.

Es associada a las  negociacions menadas e als acòrdis clavats per las associacions localas e sas federacions a sos nivèls de responsabilitat e es la sola abilitada per menar de negociacions e clavar tot acòrdi als nivèls de responsabilitat superiors.
La confederacion es sola abilitada per menar, en relacion amb las federacions regionalas, las negociacions que pòrtan suls efectius, lo nombre de pòstes e lo projècte educatiu dels establiments Calandreta.

La confederacion garantís l’identitat Calandreta. Acòrda son agrat a las associacions prefigurativas d’establiments d’ensenhament Calandreta, als quites establiments d’ensenhament e a las associacions localas que los gerisson, a sas federacions e a tota estructura que sa creacion seriá necessària per concórrer a l’objècte de l’associacion.
Aqueste agrat confederal es contractual e ligat a la qualitat de membre de drech de la confederacion :
– implica lo drech d’utilizar lo nom “ Calandreta ” e de reçaupre l’ajuda de l’ensem del movement  Calandreta.
– implica lo dever de participar als acamps, congrèsses e comissions meses en plaça per la confederacion e las federacions, tant coma aqueste de se sometre al contraròtle e a la regulacion de la confederacion.

La Confederacion Calandreta es administrada e gerida per un « conselh confederal ».

Burèu confederal :

Co-presidents : Jean-Louis BLENET, Emmanuel QUESTEL
Vice-presidents : Jean-François ALBERT, Miriam BRAS, Jean-Pierre GAFFIER
Secretari : Pierre BARRAL
Clavaira : Cécilia MORANDAT
Clavaira adjoncha : Patricia LE MASSON
Representanta dels salariats non ensenhaires : Mireille BLANQUER
Representants dels ensenhaires : Jean-François ALBERT (ja citat coma  vice-president), Julien BAYSSAC, Sandra BERNARD.
Autres membres : Paul-Robert ASENCIO, Anne MILHAU.

Los presidents de las federacions regionalas son convidats permanents al burèu confederal.

La formacion amb l’ISLRF

logo-ISLRF-RVB-transparent

La Confederacion Calandreta – Ensenhament laíc immersíu e las autras escòlas immersivas, ABCM (Alsaça/Mosèla), BRESSOLA (Catalonha), DIWAN (Bretanha) e SEASKA (País Bascol), creèron : l’ISLRF – Institut Superior de las Lengas de la Republica Francesa qu’es cargat de la gestion dels mejans financièrs de la formacion iniciala dels regents e qu’es vengut un luòc de reflexions a l’entorn de las problematicas de l’ensenhament bilingüe en immersion. Es per aquò qu’ISLRF organiza un collòqui cada tres ans. Eskolim, estructura cargada de portar las reivindicacions d’un ensenhament de las lengas dichas regionalas per immersion als poders politics e al grand public.

La formacion amb APRENE

logo_APRENE_2006_pichon

APRENE, Establiment d’Ensenhament Superior Occitan.
APRENE, Establiment d’Ensenhament Superior, ric de 15 ans de recèrcas dins los domenis de la pedagogia e de l’immersion, prepausa una formacion completa, teorica e practica, per de joves que vòlon venir regents en occitan e que tenon a ensenhar dins aquesta lenga, al dintre de las escòlas Calandreta.

Un dispositiu de transmission del mestièr coerent : la mesa en responsabilitat progressiva de regentas e regents experimentats dins la menada e la validacion de las formacions es al còr del succès de nòstra formacion pedagogica. Los bailes, paissèls e paissèls ajudaires intervenon dins cada nivèl de la formacion, aculhisson, acompanhan, vesitan, ajudan e avaloran los estudiants-calandrins.

Una aisina de concepcion e de contraròtle : lo conselh scientific d’APRENE se compausa d’universitaris, cercaires, regents e associatius. S’acampa dos còps l’an per, en ligam amb lo CA d’APRENE, validar e pensar los contenguts de las formacions.

APRENE desvolopa la formacion continua dels professors de las escòlas Calandreta, en collaboracion amb lo CFPO  (Centre de Formacion Professionala Occitan) Lengadòc.

Dempuèi 1997, lo Centre de Formacion Professionala Occitan s’encarga de la formacion continua dels Ensenhaires de las Escòlas immersivas Bressola, Calandreta, Diwan, Seaska e Zweisprachigkeit.
Las accions de formacion continua porgidas pels ensenhaires se debanan en tot se conformar amb las disposicions de la convencion ministeriala del 20 de març de 1997 emai las del libre IX del còde del trabalh.
Lo C.F.P.O es Centre agregat pel ministèri de l’Educacion Nacionala francesa e recep lo finançament de la formacion continua per totas las escòlas immersivas en lengas non oficialas de França a proporcion del nombre total d’ensenhaires pagats per l’Estat.

La Confederacion Calandreta es afiliada a l’ISLRF.