Organizacion

Le Movement Calandreta :

Las escòlas e collègis

Cada establiment Calandreta es gerit per una associacion qu’a per objècte de formar d’enfants bilingües capables de mestrejar perfiechament l’occitan e lo francés tre la fin de l’elementari. Tot aquò, mercé a l’ensenhament e a l’escolarizacion en immersion lingüistica occitana aboriva, amb una introduccion progressiva del francés en cors de cicle elementari.

Son conselh d’administracion (parents elegits a l’Amassada Generala) assegura lo foncionament e la gestion dels establiments en conformitat amb los estatuts e la Carta Calandreta, recruta lo personal non ensenhaire (ASEMs, animators, secretaris, agents), gerís las abséncias del personal ensenhaire amb l’ajuda de la Federacion Regionala, gerís las negociacions e los contactes amb las institucions localas (comuna o departament), en relacion amb la còla pedagogica de l’establiment qu’a d’èsser representada a cada acamp del conselh d’administracion.

Las Federacions regionalas e departementalas

Las federacions, en iniciar la creacion d’associacions prefigurativas, manejan la creacion d’escòlas novèlas. Las federacions an per tòca la coordenacion e lo desvolopament de servicis comuns entre las associacions gestionàrias dels establiments Calandreta. Son, per exemple, las federacions regionalas qu’inician lo movement annadièr dels ensenhaires.

La Confederacion Calandreta -Ensenhament laíc immersíu occitan

La Confederacion Calandreta – Ensenhament laíc immersíu occitan es dirigida per un Conselh Confederal compausat dels Presidents de las Federacions Regionalas e dels representants del diferents collègis de l’Amassada Generala (Collègis dels Establiments, dels Ensenhaires, del Personal non ensenhaire, de las Federacions Departamentalas,…)

Totas las escòlas e associacions Calandreta, las Federacions son aderentas de la Confederacion Calandreta – Ensenhament laíc immersíu occitan . Aquela d’aquí, per l’agrat que lor balha, garantís l’identitat de las Calandretas.

La Confederacion Calandreta – Ensenhament laíc immersíu occitan representa las escòlas e federacions al prèp dels poders publics. Es ela que, en relacion amb las Federacions Regionalas, mena las negociacions que tòcan los efectius e lo nombre de pòstes al prèp del Ministèri de l’Educacion Nacionala.

Burèu confederal :

Co-presidents : Jean-Louis BLENET, Emmanuel QUESTEL
Vice-presidents : Jean-François ALBERT, Miriam BRAS, Jean-Pierre GAFFIER, Christophe LEBEGUE.
Secretari : Pierre BARRAL
Clavaira : Cécilia MORANDAT
Clavaira adjoncha : Patricia LE MASSON
Representanta dels emplegats non ensenhaires : Mireille BLANQUER
Representants dels ensenhaires : Jean-François ALBERT (ja citat coma vice-president), Julien BAYSSAC, Sandra BERNARD.
Autres membres : Paul-Robert ASENCIO, Anne MILHAU.

Los presidents de las Federacions regionalas son convidats permanents.

La formacion amb l’ISLRF

logo-ISLRF-RVB-transparent

La Confederacion Calandreta – Ensenhament laíc immersíu e las autras escòlas immersivas, ABCM (Alsaça/Mosèla), BRESSOLA (Catalonha), DIWAN (Bretanha) e SEASKA (País Bascol), creèron : l’ISLRF – Institut Superior de las Lengas de la Republica Francesa qu’es cargat de la gestion dels mejans financièrs de la formacion iniciala dels regents e qu’es vengut un luòc de reflexions a l’entorn de las problematicas de l’ensenhament bilingüe en immersion. Es per aquò qu’ISLRF organiza un collòqui cada tres ans. Eskolim, estructura cargada de portar las reivindicacions d’un ensenhament de las lengas dichas regionalas per immersion als poders politics e al grand public.

La formacion amb APRENE

logo_APRENE_2006_pichon

APRENE, Establiment d’Ensenhament Superior Occitan.
APRENE, Establiment d’Ensenhament Superior, ric de 15 ans de recèrcas dins los domenis de la pedagogia e de l’immersion, prepausa una formacion completa, teorica e practica, per de joves que vòlon venir regents en occitan e que tenon a ensenhar dins aquesta lenga, al dintre de las escòlas Calandreta.

Un dispositiu de transmission del mestièr coerent : la mesa en responsabilitat progressiva de regentas e regents experimentats dins la menada e la validacion de las formacions es al còr del succès de nòstra formacion pedagogica. Los bailes, paissèls e paissèls ajudaires intervenon dins cada nivèl de la formacion, aculhisson, acompanhan, vesitan, ajudan e avaloran los estudiants-calandrins.

Una aisina de concepcion e de contraròtle : lo conselh scientific d’APRENE se compausa d’universitaris, cercaires, regents e associatius. S’acampa dos còps l’an per, en ligam amb lo CA d’APRENE, validar e pensar los contenguts de las formacions.

APRENE desvolopa la formacion continua dels professors de las escòlas Calandreta, en collaboracion amb lo CFPO  (Centre de Formacion Professionala Occitan) Lengadòc.

Dempuèi 1997, lo Centre de Formacion Professionala Occitan s’encarga de la formacion continua dels Ensenhaires de las Escòlas immersivas Bressola, Calandreta, Diwan, Seaska e Zweisprachigkeit.
Las accions de formacion continua porgidas pels ensenhaires se debanan en tot se conformar amb las disposicions de la convencion ministeriala del 20 de març de 1997 emai las del libre IX del còde del trabalh.
Lo C.F.P.O es Centre agregat pel ministèri de l’Educacion Nacionala francesa e recep lo finançament de la formacion continua per totas las escòlas immersivas en lengas non oficialas de França a proporcion del nombre total d’ensenhaires pagats per l’Estat.

La Confederacion Calandreta es afiliada a l’ISLRF.