Ensenhar en còrsa coma s’ensenha l’occitan

corsega-jpg
La còla pedagogica per assistir a una formacion rapida sus l’immersion dispensada pels occitans Ania Pla e Joan-Francés Albert. Fòto PMS

«S’agís pas de far classa en lenga còrsa mas de viure l’escòla en lenga còrsa»

Aquí los mots espontanèus e plen d’esper de Patric Salvatorini, inspector d’acadèmia per las escòlas bilingüas. Dijòus, èra a l’escòla mairala de Ghisunaccia per preparar la dintrada de setembre que se sembla anonciar jols auspicis melhors per l’ensenhament del còrse.

Las classas, de la pichòta al la granda seccion, faràn partida del grand plan de formacion e vendràn immersivas. Es a dire que s’i parlarà còrsa de longa, o gaireben. «E mai exactament l’autorizacion es estada balhada de metre en plaça un ensenhament del còrse a nautor de 80% per la classa palanca, la primièra e la segonda annada e a 70% per la tresena seccion» indica Patric Salvatorini. Lo dispositiu concernirà tres escòlas en Corsega sul sector de Ponte-Novu, Les Salines a Ajaccio e Ghisunaccia. «L’objectiu primièr es aqueste de poder mandar d’escolans en CP bilingües amb un nivèl que siá coerent amb los ensenhaments balhats quand òm dintra en primari bilingüe», apond l’inspector. A comptar d’aquò, las quitas disciplinas dichas non lingüisticas coma las matematicas deurián èsser ensenhadas en lenga còrsa. Es doncas per metre en plaça e formar los ensenhaires, o puslèu lor balhar qualques aisses de trabalh, que l’inspeccion d’acadèmia a sollicitada l’ajuda de dos formators, Joan-Francés Albert e Ania Pla, venguts de la region Occitània.

Aital, poguèron far part de lor experiéncia aquesida mercé a Calandreta, una ret d’estructuras immersivas qu’existís dempuèi 1979. «Avèm 70 escòlas, tres collègis e un licèu repartits sus tot l’espaci occitan e 250 enfants sus tièra d’espèra per integrar las escòlas. Es una vertadièra capitada.», explica Joan-Francés Albert. La diferéncia amb Corsega es que la ret occitana es privada e jos contracte dich non confessional.

Un bilanç positiu per l’occitan.

E lo bilanç que fan sus la situacion de sa lenga es dels mai rassegurants que considèran que son escòla a permés de far dintrar un pauc mai l’occitan dins la societat civila. Segon eles, l’immersion es a l’ora d’ara un biais eficaç per reviscolar una lenga.

«Avèm d’ancians escolans que fondèron d’associacions per reviscolar la lenga e i balhar un aspècte economic, explica lo formator, que l’enjòc es plan aquí. Cal poder ganhar d’argent en parlant còrse, occitan o basc. Es l’atrach economic que fa tot e cal pas aver paur d’o dire. Se demoram totjorn dins l’encastre del sacrat e del militantisme, podèm pas capitar, cal tirar en davant. Mas abans tot aquò, cal aprene aquestas lengas e vèsi pas que los metòdes immersius». La jòga començarà en setembre e cal esperar que se generalizarà a l’ensem del territòri dins las annadas venentas per permetre a las novèlas generacions de s’apropriar una lenga que conéisson de mens en mens.

Adaptacion de l’article de Paul-Mathieu Santucci paregut dins Corse matin lo 30 de junh de 2018.

Aquí lo ligam de l’article paregut dins Lo Jornalet lo 29 de junh de 2018

https://www.jornalet.com/nova/9904/corsega-cap-a-limmersion-dins-lensengament-public-amb-aprene-e-calandreta