Dimècres 25 de genièr de 2023 mai de 150 regents del primièr e segond gra de las Calandretas se recampèron a Masamet a l’escasença de la Jornada Pedagogica Confederala. Ni lo vent, nimai la nèu empachèron pas aquela brava còla de s’ofrir un temps de trabalh intensiu e ritmat.
Aquel eveniment unenc dins lo paisatge educatiu francés, permetèt de questionar de dralhas pedagogicas e de practicas tot en imaginant de perlongaments e d’adaptacions per las annadas futuras. Aital, lo Camin de lenga, lo portfolio e la question de las avaloracions en general, la question de la transmission de la lenga, los temps peri-escolars, coma la practica numerica, foguèron declinats en talhièrs. Aquel vertadièr temps fòrt de reflexion confirma tota la vitalitat del movement Calandreta que desira sonhar la Pedagogia mesa en òbra dins los establiments. De segur, la jornada permetèt tanben d’afortir la logica e la pertinéncia de l’immersion que demòra la pèira d’angle de l’ostal. Lo repais partejat de miègjorn balhèt de sens al « s’associar per faire escòla » e ajustèt la convivialitat necessària a aquela jornada plan emplenada !
La Co direccion d’APRENE