La Calandreta de Bocòna s’agrandís

Aquesta escòla nasquèt, en novembre de 2013, d’un projècte associatiu, uman e cultural. En rota cap a la contractualizacion amb l’Estat e sostenguda per la comuna de Leguevin, es gerida associativament pels parents.

201611231295-full
Una classa Calandreta./Fòto DDM, R. D.

Aquesta escòla far partida d’una ret que s’acampa en federacions departamentalas, regionalas e una confederacion. Respond a una Carta que definís son projècte global a l’entorn de 4 pilars : l’immersion en lenga occitana, la pedagogia que s’inspira de las tecnicas Freinet e de la pedagogia institucionala, la cultura occitana e s’associar per far escòla.

Tre la pichòta seccion de mairala, l’ensenhament en immersion mèna los enfants a descobrir una diversitat de lengas e culturas. Aquesta accion a per tòca de desvolopar un esperit de toleréncia e de respècte de la diferéncia. Aqueste aprendissatge de la lenga regionala se pòt concretisar pel passatge d’un brevet especial occitan en fin de 3èna. Per çò qu’es de la pedagogia, es dicha « activa » e s’inspira de la dinamica Freinet e de la pedagogia institucionala : balhar la pauraula a l’enfant, lo menar a l’autonomia, regular la vida de grop e se ne servir coma vector d’aprendissatge. Utiliza « d’institucions » e d’aisinas que van dins aqueste sens : lo Conselh, lo Qué de nòu, la correspondéncia, lo trabalh cooperatiu, l’auto-avaloracion… que vènon noirir los aprendissatges de l’escolan dins la tòca de las transpausar a la realitat de l’enfant fòra l’escòla… Dempuèi sa dobertura, lo concèpte agrada dins la regiona e l’escòla s’agrandís !

De fach, dempuèi setembre de 2016, la capacitat d’acuèlh dels escolans (calandrons) a doblat. Quand, en setembre de 2015, i aviá 13 enfants, una ensenhaira (regenta) e 2 ajudas mairalas, uèi son 25 escolans, 2 ensenhairas e 3 ajudas mairalas que se despartisson dins 2 classas de la pichòta seccion al CE1. L’ensenhament se perseguirà, a tèrme, fins al CM2. Se desiratz d’autras entre-senhas o tot simplament descobrir la Calandreta de Bocòna e son especificitat podètz contactar l’escòla sus : calandreta.bocona@gmail.com o seguir sas actualitats sus sa pagina Facebook « calandreta de bocona ».

Adaptat de l’article publicat lo 23/11/2016 per La Dépêche.