La calandreta de l’union se trapa per carrièra

Avián un an de relambi. A un pauc mai de tres setmanas de la dintrada, los parents d’escolans de la Calandreta, son dins una androna. Aprenguèron, dimars de ser, que lor projècte de relòtjament, concebut dins l’annada, dins l’Ephpad de la comuna se poiriá pas far. « La directritz nos mandèt un mail que i explicava que nos podián pas aculhir que lo bastiment es pas a las nòrmas per l’acuèlh de nòstre efectiu », explica Adeline Dametto, co-presidenta de l’associacion gestionària d’aquesta escòla fòra contracte.

Resultat : pas pus de locals a la dintrada pels  15 enfants escolarizats.

Les élèves et l'équipe ont quitté les lieux à la fin de l'année scolaire. / Photo DDM archives
Los escolans e la còla daissèron los luòcs a la fin de l’annada escolara. / Fòto DDM archives

« Avèm cercat de solucions pendent mai d’un an ». Mas las peripecias de lòtjament d’aqueste establiment remontan, non pas a aqueste dimarc, mas a 2015. Aquela annada, la comuna de l’Union anóncia a la Calandreta que deu daissar, d’aquí la fin de junh de 2016, l’ancian centre de lésers ont es installada, per i far d’òbras de refeccion. « Passèrem un acòrdi en 2016 per daissar un an de relambi », explica de son costat, David Rofé, conse adjonch de la comuna, en carga de las finanças e de las ressorças umanas. « Pendent mai d’un an cerquèrem de solucions coma aquesta del priorat de Crotz-Daurada o de l’Ehpad, mas tot cabussèt », detalha Adeline Dametto.

Un apèl a la solidaritat

En perdicion, l’associacion en carga de l’escòla occitana demanda d’ajuda. « Lancèrem un apèl a la solidaritat per trapar un terren, un ostal desocupat del loguièr moderat per poder far la dintrada », apond la co-presidenta.

Segon la comuna, la Calandreta es pas estada avisada d’aquesta rebombida. « Avèm pas de solucions, contactèrem las comunas a l’entorn, mas degun es capable de los acceptar e podèm pas remandar las òbras de l’ancian centre de lésers. Un projècte es en cors », apond l’elegit de la comuna.

Anaïs MUSTIERE.

Adaptacion de l’article publicat lo 09/08/2017 dins la DEPECHE.fr. http://www.ladepeche.fr/article/2017/08/09/2625455-l-ecole-occitane-la-calandreta-se-retrouve-a-la-rue.html