La calandreta La Garriga entraina los liceans de ginhac dins son carnaval.

Los dos establiments, a dos passes l’un de l’autre sul camin del Molin de Carabòta, menèron amassa lo carnaval. Afar tradicional occitan, la manifestacion se celèbra cada annada en fanfara a l’escòla Calandreta la Garriga.

Cants, musicas, folclòr e costumas èran doncas de sortida dijòus 2 de mars, mas per aquesta edicion, las pichòtas mans dels liceans de seccion « Service A la Personne et Aux Territoires » (SAPAT) del licèu agricòla de Ginhac confeccionèron los petaçons, vestits tradicionals  faches de bocitons de teissuts e estòfas al biais d’un patchwork.

La tradicion e lo folclòr de la Calandreta se convidan al licèu agricòla. (TC)
Lo carnaval aspergiguèt de sas colors la cor del licèu. (TC)

L’implicacion dels estudiants s’arrestèt pas aquí que los futurs professionals, per d’unes dels sector de la Pichòta enfància, prenguèron en man l’animacion del tantòst. Entrainèron los calandrons dins una farandòla carnavalenca per las alèas del licèu, e faguèron descobrir los bastiments a sos pichòts vesins.

L’animacion d’aqueste carnaval èra un projècte avalorat pels liceans de SAPAT. (TC)
La farandòla dels costumes que los liceans farguèron pels escolans de la Calandreta pendent lo Carnaval. (TC)
Los liceans de segonda, enquadrats per Florence Salotti, beneficièron de l’ajuda dels collegians de tresena d’Uriell Gomez per preparar las saquetas de confetis, fargar los decòrs e marcar los percors a la greda dins la cor.
Aqueste projècte, capelat per Myriam Gomez, encantèt parents e enfants que venguèron en familha participar al carnaval. Una collaboracion festiva, pasmens educativa, de renovelar !
Tiphaine Comby.
Adaptat de l’article publicat lo 11 de mars de 2017. Midi Libre.  / http://www.midilibre.fr