La Calandreta Los Cascamèls muda a Rius de Menerbés

Aprèp 9 ans d’existéncia e 3 ans de contractualizacion amb l’Educacion Nacionala, la calandreta Los Cascamèls, es a mand de crompar sos locals. « N’avèm fòrça discutit, somiat. Nos semblava dificil mas sabiam qu’èra essencial per poder contunhar a manténer nòstra escòla dins aqueste canton de campèstre e passèrem a l’accion » explican las co-presidentas d’aquesta estructura associativa. Lo vilatge aviá cap de bastiment que conveniá per aquesta implantacion, las recèrcas s’espandiguèron a las autras comunas del ròdol.

Enfin, un luòc s’impausèt : l’ancian CAT de Rius de Menerbés. Amb son pargue, la proximitat del gimnasi e de l’estadi del collègi. Fariá una escòla formidabla pels calandrons… aprèp d’òbras en nombre.

Calguèt far de plans, rescontrar de partenaris, convéncer las bancas e i sèm !

Los Cascamèls
L’escòla occitana va venir proprietària de l’ancian CAT.

Un pòl cultural

Lo bastiment de 320 m² comptarà 3 classas de mai de 60 m², un refectòri, una sala de dormida e un grand garatge, sus una parcèla aboscada de 1 800 m² per las activitats pedagogicas. Amb son associacion Lo Rossinholet, la calandreta portarà lo projècte mai ambiciós d’èsser un pòl cultural, d’activitats e d’escambis alentorn de la cultura occitana. Mantunas associacions partenàrias son ja interessadas. Aquesta etapa novèla es essenciala per assegurar una escolaritat confortabla e perenna als 45 enfants del Menerbés d’Aude e d’Erau, e a tèrme 60, que faguèron la causida d’una escòla en occitan amb una pedagogia diferenta. Tot lo mond pòt participar a l’aventura, basta d’ofrir un pòt de pintura, un WC, un burèu, de carrelatge, o autre. Una tièra de naissença qu’especifica objèctes e materials necessaris a la realizacion d’aqueste projècte, es en linha sus internet : www.mesenvies.fr/ liste-cadeaux/4622860

Del correspondant de l’Independant paregut lo 19/06/18