La pedagogia Calandreta

L’immersion aboriva en occitan

Calandreta es una escòla qu’utiliza lo metòde d’immersion lingüistica tre la mairala, per fin de valorizar e desvolopar las capacitats d’enfants joves d’aquesir una segonda lenga e de mestrejar doas lengas d’un biais equivalent.

Amb l’immersion lingüistic, l’occitan servís a ensenhar de disciplinas non lingüisticas, coma las matematicas, l’istòria-geografia. L’occitan es lenga d’ensenhament e lenga ensenhada.

A Calandreta, la practica del bilingüisme aboriu dobrís naturalament a las autras lengas e culturas romanas e a totas las autras. Tre la mairala, sensibilizacion a la diversitat lingüistica (Musica de lengas). En primari, lo programa Familhas de Lengas apòrta un estudi mai aprigondit de las correspondéncias entre las lengas, çò que mena los enfants a descobrir la diversitat dins lo respècte de las diferéncias.

Avantatges : en mai de l’aquisicion d’una segonda lenga e los avantatges practics que balha, l’educacion bilingüa desemboca sus una vertadièra dobertura pluriculturala, sus la practica de l’interculturalitat e sus una dobla lectura del mond e de la realitat. Es completament lo contrari del replegament e de l’embarrament. Lo bilingüisme dobrís tanben de perspectivas de plurilingüisme. L’enfant qu’aquesís una segonda lenga melhora sa primièra lenga e pòt mai aisidament n’aquesir d’autras.

Una pedagogia activa

La pedagogia Calandreta : balhar la paraula a l’enfant, lo rendre autonòm, regular la vida de grop e l’utilizar coma vector d’aprendissatge. Utiliza d’ « institucions » e d’aisinas pedagogicas que van dins aqueste sens : lo Conselh, lo Qué de nòu, la correspondéncia, lo trabalh cooperatiu, l’auto-avaloracion… s’inspira per aquò far de las tecnicas Freinet e de la pedagogia institucionala.

Far l’escòla amassa

Calandreta es un ensemble d’associacions autogeridas que vivon de la participacion dels parents a totes los nivèls. Acompanhan lo desvolopament de l’escòla e s’assòcian als ensenhaires per menar los projèctes de l’escòla.

De temps de rescontres regulars, que sián al nivèl del movement tot entièr (congrèsses de las Calandretas) o que sián al nivèl de cada escòla (rescambis), son de moments d’escambis, de reflexions collectivas, d’elaboracion de proposicions, que venon alimentar lo projècte Calandreta.

Calandreta a per vocacion de venir una compausanta vertadièra d’un servici public renovelat ; aplica d’ara endavant los programas de l’Educacion Nacionala.