Lo collègi Calandreta de Pau espèra mudar d’aquí dos ans

Lo collègi Calandreta es installat dempuèi 2012 dins los locals del licèu Honoré Baradat. © Arquius Jean-philippe Gionnet .

Lo collègi Calandreta, installat dempuèi 2012 dins los locals del licèu Honoré-Baradat, deuriá mudar a la dintrada venenta, benlèu la seguenta.

Lo collègi  Calandreta deuriá mudar dins gaire de temps. la Region Nouvelle Aquitaine buta lo Departament a trapar una solucion per « albergar » dins un collègi aqueste establiment qu’aculhís 37 collegians dins los locals del licèu Honoré Baradat. « Çò mièlhs seriá de mudar a la dintrada venenta, mas s’es pas possible, la Region nos daissarà dins nòstres locals d’Honoré Baradat. Caldrà trapar una solucion per la dintrada seguenta », precisa Daniel Barneix, lo president de la federacion departamentala.

« Lo mai d’ora serà çò mièlhs »

Del costat del Departament, lo dorsièr es ja plan avançat, e lo trabalh de recèrca es en cors. « Trabalham sus diferentas ipotèsis per integrar lo collègi Calandreta dins un autre collège paulin. Lo mai d’ora serà çò mièlhs », espèra Denisa saint-Pé, vice-presidenta del conselh departamental en carga de l’educacion. Amb un efectiu qui poiriá doblar d’aquí qualques annadas, la question de l’albergament de collegians venguts de luènh comença èla tanben a se pausar que cinc familhas dels Pirenèus Nauts escolarisan sos enfants al collègi. Fins ara, los collegians son albergats dins de familhas d’acuèlh los diluns e dijòus de ser. La federacion desira ara anar mai luènh. « Lo projècte de desvolopament, es d’aver l’internat », espèra Brigitte Vergez, presidenta de l’associacion del collègi.

Tres escòlas dins l’Agglo, nòu en Bearn

En mai del collègi, i a nòu escòlas primàrias Calandreta dins lo departament, que tres son dins l’aglomeracion paulina. Coma al collègi, l’ensenhament s’i fa en immersion totala dins la lenga occitana. « Tot es mes en òbra per permetre al enfants d’ausir e practicar la lenga en permanéncia », precisa Daniel Barneix.

Entre aquestes establiments, la Calandreta Paulina, carrièra del Capitaine Guynemer, foguèt la primièra a dobrir. Èra en 1989. Dempuèi, lo succès se desmentís pas amb, notadament, la mesa en plaça d’un tièra d’espèra dempuèi lèu quatre ans. Solucion pels parents : las Calandreta de Lescar e Calandreta de Mazères ont i a pas de tièra d’espèra. Los diferents establiments an previst de jornadas pòrtas dobèrtas dins los jorns venents.

D’aprèp Kevin Estrade, La République des Pyrénées, publicat lo 22 de mars de 2017. k.estrade@pyrenees.com.