Pàmias, l’escòla Calandreta dobrís las pòrtas – 25 de mars

Escòla associativa, laïca, en contracte amb l’Estat. Aculhís los enfants de la Tota Pichòta Seccion de mairala al CM2, dins 3 classas d’un vintenat de plaças. Sa particularitat : l’aprendissatge de l’occitan en immersion. Los mejans utilizats : de pedagogias activas (Freinet entre autras), l’implicacion fòrta dels parents dins la vida de l’escòla, la dobertura sus las culturas d’aquí e d’endacòm mai…

Se vos pausatz de question coma « mas a qué pòt servir d’èsser bilingüe en occitan ? » o « qué se passa en classa, e dins lo cervèl dels enfants quand seguisson aqueste ensenhament ? », podètz venir assistir a la conferéncia que vos prepausam a 15h30, sul tèma « Lo bilingüisme aboriu en occitan : perqué ? cossí ? ». Emilie Chorin, jove cercaira en sciéncia del lengatge, nos presentarà aqueste subjècte que tractèt, en partida, dins sa tèsi e respondrà a las questions. Es gratuit e dobèrt a totes !

La Calandreta es albergada dins los locals de l’espaci occitan.

Aqueste espaci cultural dobrirà tanben las pòrtas lo 25 de mars, meteisses oraris que la Calandreta, per presentar las activitats de las associacions Lauseta (associacion culturala pel sosten e lo desvolopament de l’occitan : corses de cants, de dança, festenals…) e l’IEO (institut d’estudis occitans : corses d’occitan, bibliotèca, centre de ressorças, conferéncias e animacions…)

L’escòla Calandreta dobrirà las pòrtas lo dissabte 25 de mars de 10 h a 18 h al 11 carrièra Henri Fabre – Zac de Pic – a Pàmias.

Contact calandreta : 05 61 60 58 08 / lacalandreta09@orange.fr

Film « Calandreta, una escòla per doman » : www.calandretamip.org