Pàmias : quand l’occitan vos para los braces a la Calandreta

«Pòrtas dobèrtas»

Sandra Bernard e Jean-Marc Saint-Michel vos espèran per las « pòrtas dobèrtas » de la Calandreta, lo 25 de mars./ Fòto DDM, R.S

La Calandreta, albergada dins los locals de l’espaci occitan, organiza sas « pòrtas dobèrtas » coma cada annada. L’escasença de descobrir l’aprendissatge de la lenga d’òc en immersion.

La dintrada es ja deman ! Es per aquò que l’escòla bilingüa Calandreta organiza « sas pòrtas dobèrtas » lo dissabte 25 de mars, de 10 oras a 18 oras. Aurètz tanben l’oportunitat de vesitar La Lauseta e l’IEO (Institut d’Estudis Occitans). « Cada annada, organizam las « pòrtas dobèrtas » per far conéisser la pedagogia e la particularitat de la Calandreta, qu’es l’immersion en lenga regionala. Presentam l’escòla e explicam sas especificitats », indica Sandra Bernard, cap d’establiment e regenta en classa de mairala.

De fach, dins aquesta escòla associativa en contracte amb l’Estat, l’occitan es aprés en immersion. L’enfant parla, ausís parlar l’occitan tot lo manne del jorn,  aital memoriza de mots e cap a 5 ans es capable de ne dire qualques uns. E per Jean-Marc Saint-Michel, copresident de l’associacion, l’occitan pòrta tanben de valors. « La lenga occitana permet de se dobrir sus las lengas romanas. l’enfant renfòrça tanben sa lenga mairala, que totas las letras se pronóncian. L’escolan establís una palanca entre las doas lengas. Dins un monde cambiadís, es important de tornar a sas rasigas per se dobrir al mond de deman.  E mai la region se sona Occitània ». Mas dins aquesta escòla qu’aculhís los dròlles del TPS al CM2, los parents an tanben un ròtle de jogar, e es quitament l’un dels credo de l’establiment, coma nos ditz Sandra Bernard. « Cadun pòrta sa part e cada parent s’investís a son nivèl. Dins aquesta escòla associativa, lo far-amassa es fòrça important, aquí lo « nos » es mai important que non pas lo « ieu ». Los dròlles, la familha e los ensenhaires an de formar un sol grop ».

Conferéncia sul bilingüisme

Son doncas los grands de l’escòla (CM 2) que vos faràn vesitar las diferentas classas. Serà seguit d’una presentacion del ritme d’una jornada, de las pedagogias activas… tot aquò jos forma d’una vidèo que presenta l’estructura, « per rendre la vesita interactiva »,  apond Sandra Bernard. Una intervenaira balharà una conferéncia sul tèma de sa tèsi « Lo bilingüisme aboriu en occitan : perqué ? cossí ? ». Costat animacion, d’activitats seràn proposadas a l’entorn de la partida culturala (dança, cant…) E se vòstre enfant pòt pas pus quitar la lenga d’òc aprèp son passatge a Calandreta, es possible de contunhar d’estudiar al collègi calandreta de Tolosa.

« Pòrtas dobèrtas » lo dissabte 25 de mars, de 10 oras a 18 oras. A gràtis e dobèrt a totes.