Partenaris associats

La ret dels CFPO

Compausat dels Centres de Formacion Professionala Occitans d’Ortés, Miègjorn-Pirenèus e Besièrs, aqueste ret a per tòcas :
- L’animacion de talhièrs d’occitan e d’estagis intensius cap als adults, parents de calandrons notadament.
- La formacion professionala de formator d’adults en lenga e cultura regionalas.
- Lo desvolopament de testes de mestritge de l’occitan en conformitat amb lo Quadre europèu comun de referéncia per las lengas.

En mai los CFPO desvolopan de projèctes de formacion cap a de personals de las collectivitats territorialas, del ostals de retirada o per un public en insercion, e aital fan la pròva que l’occitan representa tanben un avantatge professional de mai en mai important en Occitània.

Enfin lo CFPO Besièrs es gestionari dels fons de la formacion continua dels ensenhaires de las escòlas immersivas en lengas dichas regionalas.

Institut Latinitas

Las escòlas occitanas Calandreta pensan l’aprendissatge de l’occitan coma una dobertura sul mond, e an experimentat pro d’ora l’aprendissatge de mantunas lengas. La soscadissa a l’entorn del bilingüisme actiu aboriu per immersion, e mai los escambis amb d’escòlas d’autres païses endralhèron un trabalh sus las lengas. Aqueste trabalh, menat per de regents, e seguit per d’universitaris interessats, pròva la capacitat dels escolans de se dobrir a las autras lengas, e de dintrar dins las lengas de sa familha de mercé a sas capacitats bilingüas : dins las escòlas immersivas, los enfants se bastisson una representacion lingüistica qu’es pas tancada dins una sola lenga. Desvolopar sas capacitats es l’objectiu del programaFamilhas de Lengas menat pel nòstre Institut cotria amb lo centre de formacion APRENE.

presentacion del programa « Familhas de lengas »

La Poesia

Creada en 1995 per paliar la manca de libres en occitan pels joves, la Poesia es una associacion d’edicion. La Poesia participa activament a l’equipament de las escòlas en espleits pedagogics adaptats.

La Poesia publica de libres escolars e de libres de lésers. Totas las publicacions son en occitan : Gascon, Provençal e Lengadocian.

- Bendas dessenhadas : Titeuf, edicion occitana dels n° 7 e 12
- Contes de la Cigala : libretons e CD audiò, jòcs e revirada en francés a la fin
- Colleccion Belòia : contes pels mai pichons
- Colleccion Bib’Òc : colleccion originala de romans pels joves
- Libres escolars : libres revirats e creacions pedagogicas realizadas pels regents de Calandreta
- Espleits pedagogics : mapamundi, cartas abecedaris, fichièrs pedagogics Palancas e L’estelum

Blog : http://edicionlapoesia.blogspot.com

Lecture e òc

Los objectius de l’associacion son la sensibilizacion e la descobèrta d’obratges occitans, per tota mèna de publics, qual que siá lor nivèl de lenga e lor atge.

Per aquò far LECTURA E ÒC desvolopa mantunas accions :
–  De presentacion d’obratges pels aderents.
– L’elaboracion d’aisinas a destinacion de las mediatècas.
– L’enregistrament de cronicas radiofonicas que presentan d’obratges : a escotar sus « Radiolengadòc » nòstre partenari.
– D’accions ponctualas a l’entorn d’un libre.

Per aquò far un animator es estat  recrutat per l’associacion.