Pau : las còlas del collègi Calandreta espèran una solucion perenna

La Region o confirmèt : lo collègi Calandreta deuriá poder demorar una an de mai dins los locals del licèu Baradat. Una solucion de tèrme cort, mas qu’assegura pas lo futur.

Les élèves du collège Calandreta devraient normalement rester dans les locaux du lycée Honoré-Baradat l’an prochain. © Marc Zirnheld
Los escolans del collègi Calandreta deurián normalament demorar dins los locals del licèu Honoré-Baradat l’an que ven. © Marc Zirnheld

La question se pausa a cada fin d’annada escolara : ont se traparà lo collègi Calandreta a la dintrada seguenta ? Alara que lo Departament – institucion en  carga dels collègis – a pas pogut trapar cap de solucion, la Region o confirmèt lo collègi Calandreta deuriá fin finala poder demorar un an de mai dins sos locals del licèu Honoré Baradat.

«Aquesta novèla nos pòrta de serenitat. Sabèm al mens ont serem l’an que ven» se regaudís Maria-Peire Baylocq-Sassoubre, cap d’establiment d’aqueste collègi que prepausa de corses en immersion totala en occitan. Una solucion provisòria doncas, mas qu’a lo meriti de sostar la còla d’aqueste establiment, menaçat dempuèi qualques setmanas de se trapar per carrièra lo 31 de julh venent.

La region assoplís sa pausicion

La novèla tornèt tanben balhar lo sorrire als membres de l’associacion acampats aqueste dijòus per una amassada generala. Qualques setmanas a, aprèp una primièra AG que son quorum foguèt pas complit, venguèron nombroses per far lo ponch sus aquestes darrièrs meses, mas tanben per soscar als objectius de las annadas venentas. Demest las ambicions del collègi, la situacion geografica a una plaça preponderanta. «Volèm melhorar las condicions d’acuèlh dels collegians per de locals definitius e un internat. Batalham per aquò e capitarem», ambiciona Brigitte Vergez, la presidenta de l’associacion del collègi.

Quand l’institucion regionala s’èra, fins ara, mostrada  fòrt rigorosa per que lo collègi quite los locals del licèu Honoré-Baradat, a recentament assoplida sa pausicion. «Se i a pas de solucion, los anam pas daissar tombar e podràn demorar un an de mai dins los locals del licèu Baradat. Daissarem pas lo collègi Calandreta per carrièra» assegura Joan-Loís Nembrini, lo vici-president de la Region Novèla-Aquitània en carga de l’educacion.

Una pausicion que la Region cambièt leugièrament per rapòrt a qualques setmanas a (edicion del 13 d’abril) que, alara, èra absoludament pas question de perlongar aqueste balh que mobiliza mantunas salas del licèu Baradat per sonque 6 000 € per an. Se la region tornèt sus sa decision es tanben que lo Departament lor provèt que contuhava de cercar una solucion.  «Notèri plan que lo Departament aviá demandat al collègi Clermont e que lo conselh d’administracion de Clermont aviá refusat», soslinha Joan-Loís Nembrini.

Un efectiu en creis constant

Las inquietuds del collègi Calandreta ne son pas mens vertadièras : cap de solucion existís pas per las annadas seguentas, d’autant mai que los efectius son en constanta augmentacion. a la dintrada, òm deuriá passar los cinquanta collegians, dont 15 veire 19 en seisèna. Se contunham de grandir aital, nous caldrà trapar una solucion amb lo Departament. Esperam una responsa un pauc mai precisa pel futur», espèra Maria-Pèire Baylocq-Sassoubre per pas pus aver de se pausar cada annada aquesta question fatidica de saupre ont serà lo collègi a la dintrada seguenta.

Adaptat de l’article publicat dins  la République des Pyrénées lo 13 de mai de 2017 per KEVIN ESTRADE k.estrade@pyrenees.com