Pena d’Agenés : una calandreta dobrirà a la dintrada de setembre

Fòto Pèna d'Agenés
Fòto DDM, arquius J.-M.M.

Aprèp Jansemineta en 2014 a Agen, Lo Caminòl a Pena es la segonda calandreta que va dobrir dins Òlt e Garona.

Aprèp un an e mièg d’existéncia, l’associacion « Envol 47 » va dobrir una escòla en lenga occitana, sul site de « Sant Martin de las Catlas », qu’aparten a la comuna.

Es oficial dempuèi sonque qualques jorns. L’anóncia publicada en linha sus la pagina Facebook de l’associacion data del 13 de julh al ser : Lo Caminòl, una calandreta o escòla occitana, privada associativa, portada per « Envol 47 », dobrirà sas pòrtas a la ditandrada de setembre a  Pena-d’Agenés.

Nòu dròlles entre 3 e 5 ans son ja marcats per la dintrada, l’ensenhaira, Virginia Chibau seguiguèt ongan una formacion al metòd Freinet e tradicional e una ASEM es estada recrutada.

«Al començament, lo projècte èra de dobrir una escòla a Vilanòva o lo Vilanovés », rementa Clemença Frégard, la presidenta d’Envol 47. Mas las comunas de Vilanòva, Biàs, o Pujòls respondèron pas favorablament a nòstras demandas de mesa a disposicion de locals » L’associacion s’èra tanben mesa en contact amb la comuna de Santa Colomba de Vilanòva qu’a pas pus d’escòla e que proposava un bastiment a gràtis, « mas i a tròp d’òbras de far ».

Nòu enfants a la dobertura

Fin finala, es a Pena, ont demòra Clamença Fregard e ont cultiva e comercializa de plantas aromaticas e medicinalas, que Lo Caminòl va dobrir : « La comuna nos met a disposicion a gràtis l’anciana escòla de Sant Martin de las Catlas. A carga per nautres de far qualques òbras per aculhir los enfants e de pagar l’aiga, l’electricitat, las cargas costumièras. Lo site es supèrb, es al mitant del campèstre, es perfièch per nòstre projècte ».

Cambiar de luòc e anar a Pena puslèu qu’a Vilanòva auriá pogut descoratjar d’una familhas : « En realitat, anam metre en plaça de coveituratge e las familhas son lèstas a far la rota per un projècte que i participan e que lor conven. Avèm pas de problèma d’efectiu, al contrari ».

L’escòla dobrirà amb 9 escolans. Per comparar, la Calandreta Jansemineta que dobriguèt a Agen en 2014, l’aviá fach amb sonque 3 enfants : « La tòca, es de començar doçament, per prene nòstras marcas ».

Mòbles de recuperacion

Costat budgèt, l’acòrdi amb la comuna regla lo problèma del loguièr : ‘l’escolaritat es gratuita. La Federacion Regionala Calandreta que i sèm afiliats pren en carga lo salari de l’ensenhaira que pilòta lo projècte educatiu. De nòstre costat, pagam los fraisses mercé a la contribucion de 25 € per enfant e per mes, per la primièra annada, en esperant la baissar dins l’avenir ».

Los parents d’escolans participan activament a la cèrca d’un finançament que permetrà la vida de la classa, per aquò, organizan de vendas de produches manufacturats suls mercats, o renòvan de mòbles e material ancians : « Per far d’economias mas tanben per pas gastar en crompant de nòu quand se pòt reciclar ». E justament, Lo Caminòl es en cèrca de cadièras per enfants de mairala, de lièches per la dormida e tanben de material educatiu.

Calandreta « Lo Caminol », envol47@gmail.com e sus Facebook « Calandreta Lo Caminol ».

Adaptacion de l’article de Jérôme Schrepf paregut lo 20 de julh de 2017 dins La Dépêche

Calandreta : un projècte «bon per tot lo monde»

Arnaud Devilliers met a disposicion, a gràtis, los locals de l’anciana escòla de Sant Martin de las Catlas en esperant de los vendre / Fòto DDM.

Lo conse de Pene d’Agenés, Arnaud Devilliers, o reconéis sens mal : «L’occitan, es pas ma cultura». Pasmens, es estat convençut pel vam dels parents d’Envol 47 : «Son pas de folastres. Lor projècte es estructurat. Los ensenhaires de nòstra escòla comunala bilingüa francés-occitan veson pas de problèmas a la dobertura d’una Calandreta. Costat comuna, avèm mes en venda l’anciana escòla de Sant Martin de las Catlas, mas que demòra vuèja per l’ora e se podiá gastar o èsser vandalizada. Aquí, es ocupada, mas totjorn en venda : la pacha amb l’associacion, es que en cas de crompa per un terç,  s’engatjan a daissar los luòcs en dos meses. Es un projècte dinamic, una riquesa de mai per la comuna, Es bon per tot lo monde».

Per l’associacion Envol 47, que pòrta lo projècte «Lo Caminol», la tòca es tanben de nosar de ligams amb la comuna : «La dobertura de l’escòla va segurament butar una familha a s’installar sus Pene, e crear una dinamica : quand aurem de mercats o d’eveniment d’organizar al benefici de l’escòla, o farem aicí», nos fisa Clamença Frégard.