La calandreta de Castras a dobert sas pòrtas

L’escòla bilingüa Calandreta, 47 carrièra Marcel Briguiboul, dobriguèt sas pòrtas al public qualques jorns a. Sul lindal de l’escòla, una maire d’escolan guidava los visitaires e testimoniava aital de l’implicacion dels parents.

Un école adepte de la pédagogie Freinet.

Valery Vidal, cap d’establiment d’aquesta escòla associativa qu’aculhís 63 escolans, presenta las caracteristicas d’aquesta estructura amb entre autre  : « L’ensenhament de l’occitan en immersion lingüistica, la pedagogia Freinet que favoriza fòrça projèctes montats en pichòts grops e encoratja l’autonomia. Los enfants causissan sos activitats ; apròchi sensorial, vida practica, descobèrta del mond… » Sortidas culturalas o classas verdas o blavas, mercat de la prima gerit pels enfants, projècte carnaval amb las autras Calandretas de Tarn (5 en tot) son tanben al programa del luòc.

« Los enfants son actors de lor aprendissatge », apond Delphine, l’una de las regentas. La còla pedagogica, los animators del temps peri-escolar, director del centre de lèser associat a l’escòla e autres membres del personal reprensentan un quinzenat de personas al servici de l’escòla.

Lo resson dels parents
Del costat dels parents… Isabelle fa lo desplaçament cada jorn de Puèglaurenç per aquí menar sos enfants. Li agrada mai que mai « la pedagogia, la soplesa d’organizacion e la dobertura cap a l’exterior amb de sortidas cap al musèu Goya, La Villegiala (cants occitans) o encara l’estacion d’epuracion i a gaire ». De sortidas que los tèmas son puèi espleitats en classa.

Aubin, paire d’un escolan, mas tanben president de l’associacion gestionària de l’escòla, aderís de son costat a « la pedagogia, al bilingüism e a l’aspècte associatiu ». Linda, maire de 4 enfants, ditz tanben son interèst per l’estructura : « Es una escòla del caractèr familial ont lo mond se coneisson mas degun jutja pas degun. M’agrada l’ambient, l’acuèlh, l’escota. Los enfants an drech a la paraula ! L’ensenhament ten compte del ritme de cada enfant amb sas dificultats o sas aspiracions ». Linda… perfiècha ambassadoira d’aquesta escòla ont doblidan pas qu’abans d’èsser d’escolans, los enfants son d’enfants.

Adaptacion de l’article de M.M. publicat lo 28/04/2017 dins La Dépêche du Midi.