Pòrtas dobèrtas a la calandreta de Pàmias

Calandreta : mai qu’una simpla escòla en occitan

Sandra Bernard, la directritz e  Jean-Marc Saint-Michel, un dels copresidents. /Photo DDM, archius.

Creada, fa 23 ans, la calandreta de Pàmias dobrissiá la pòrtas al public ièr. L’escòla occitana vòl ganhar un vintenat d’escolans dins las annadas venentas.

«Aquesta escòla es nòstra. Es çò que ne fasèm». Aquí lo messatge dels parents de la calandreta a l’escasença de la jornada pòrtas dobèrtas organizada ièr.

Volián mostrar que la calandreta es mai qu’una simpla escòla ont s’apren l’occitan. « Una aventura » umana ont cadun participa al projècte educatiu. Una filosofia educativa.  E es segurament per aquò qu’una partida dels enfants que i son marcats an pas forçadament de ligam amb la cultura occitana al començament. « Es lo costat familial que m’atraguèt, lo fach de se poder inverstir dins l’educacion dels enfants. Fin finala, l’occitan pren tot son sens dins un caminament mai global», explica una parenta d’escolans. Aqueste de l’enrasigament dins una cultura locala coma, Jean-Marc Saint-Michel, lo copresident, ne fa la remarca. «Dins aqueste mond bolegadís, es important de s’apiejar sus las rasigas e la cultura. Es aital que se crea la dobertura».

Los establiments calandreta repausan sus 4 pilars : la lenga, la pedagogia (metòde Freinet e pedagogia institucionala), la cultura e lo « far amassa ». Parents e ensenhaires fan l’escòla amassa. «Formam de ciutadans en capacitat de pensar d’espereles», indica lo copresident.

Creada fa 23 ans, uèi la calandreta compta un seissantenat d’escolans repartits sus tres cicles (pichòta seccion ; CP et CE1 ; CE2, CM1 e CM2). L’objectiu de l’escòla es d’arribar al nombre de 80 escolans. «Aital l’escòla seriá estabilizada», apond Jean-Marc Saint-Michel.

Sol problèma, dins las zònas ruralas coma Arièja, lo còst de l’escolaritat  (350 € per an) e la distància frenan las causas. Per ganhar 20 escolans, l’escòla a mantuns projèctes que poirián capitar dins los meses venents.

Fèsta occitana

Lo 1èr de julh, la calandreta organiza una fèsta occitana.

Començarà a 14 h amb una quermessa. Serà l’escasença de participar a una dictada occitana.

A 16 h 30 : espectacle dels enfants de l’escòla e corala. Puèi aperitiu ofèrt en musica.

En seguida, podretz participar a un repais amb un concors culinari. La jornada s’acabarà per un balèti e un fuòc de la Sant Joan (un pauc tardiu).