E una de mai !
Lo diluns 4 de setembre marca per totes la dintrada 2023-2024 ! Amb ela, lo retorn dels mainatges*, dels parents e dels regents ven una realitat qu’aurà escapat a degun ! Coma a cada còp, la temporada* mescla, jòias, dobtes, paurs, espèrs, estrambòrd* e desirs. Lo vam dels unes e dels autres fa levar la posca* d’en pertot e los establiments se tòrnan emplenar d’aquela energia creatritz qu’aimam tant a Calandreta. D’unas causas son immudablas a cada dintrada mas d’autras seràn novèlas. Aquela Nòva Letra ne farà partida, e cada primièr dimècres de cada mes, vos anam prepausar de descobrir l’actualitat e d’unas reflexions del movement. Coma o vesètz, la causida linguistica se vòl clara amb çò que sèm. Fasèm viure los establiments en occitan e es aital qu’anam escriure. Non pas per resisténcia o provocacion mas just per coeréncia. Aquò vòl pas dire qu’anam desbrumbar* los que descobrisson Calandreta e la lenga e vos ajudarem a cada còp per vos poder passejar dins la Nòva Letra amb simplicitat.
Bastida a l’entorn de cinc articles illustrats, la Nòva Letra se vòl aisida de legir sens jamai perdre l’objectiu de partejar çò que fa sens dins las classas coma dins lo movement. Aqueste numèro 0 lança un objècte novèl dins lo nòstre paisatge e esperarem amb interès los vòstres retorns e comentaris per fin de ne melhorar totjorn lo contengut. Vos desiram a totes, mainatges, parents, regents e amics de totes los establiments una plan bona dintrada en esperant vos véser nombroses pel Congrès 2024 !
C. Simonato e J-F. Albert per la Confederacion e l’establiment APRENE
mainatges : enfants – desbrumbar : oublier – temporada : période – estrambòrds: enthousiasme – posca : poussière
