1993 : La segonda escòla de Besièrs, Calandreta dels Falabreguièrs, obrís al mes de febrièr dins lo restaurant del centre de lésers tengut pels curats… A Narbona, la Calandreta Narbonesa-la Granhòta, obrís dins un ostal de la carrièra de las arts en març… Lo desvolopament !
La pròva ? Calandreta a, a la dintrada de setembre de 1993, 17 escòlas dobèrtas e escolariza 681 mainatges amb 43 ensenhaires.
Tre 1993, la Confederacion lança un primièr ensag de formacion iniciala pels ensenhaires de las Calandretas.
En Julhet, la Confederacion Occitana de las escòlas Calandretas convida lo ministre de l’educacion nacionala, François Bayrou a son congrès a Auloron Santa Maria en Bearn. François Bayrou prepausa de reconéisser las escòlas amb l’immersion e la gestion associativa coma caractèr própri Es lo primièr còp que l’Estat francés accèpta de reconéisser l’immersion a l’escòla.
Mentretant, Calandreta se desvolopa totjorn. La federacion de Miègjorn-Pirenèus obrís successivament Castras, Pàmias, Tarba, del temps que d’autras escòlas se preparan coma Banheras de Bigòrra o Castanet Tolosan. En Aquitània es l’epòca ont se crèa Lescar. En Lengadòc, naisson las Calandretas de Pèzenas, Gignac e Carcassonne. E Limòtges obrís sola al Nòrd d’Occitània.
1994 : En decembre, la Confederacion accèpta de signar l’acòrdi de Bayrou. Calandreta, a contra-còr cal plan lo dire, entre dins la lei de 1959 : a partir de setembre de 1994, 46 ensenhaires son pagats per l’Estat.
Un autre aspècte de l’acòrdi signat amb François Bayrou es que lo caractèr laïca e associatiu de las Calandretas, sa pedagogia e son projècte Latinitasd’ensenhament de las lengas de la familha de las romaniques fan partida del tèxt de l’acòrdi oficial.
1995-96 : Après l’Escòla, Calandreta inventa l’Establiment d’ensenhament superior en occitan. Un còp l’acòrdi Bayrou signat APRENE es creada en febrièr de 1995 e lo ministèri de l’Educacion Nacionala, de la Recèrca e de l’Ensenhament Superior conventionne aquel establiment lo 6 de mai de 1996. Aquela annada, l’escòla d’Orange (Provença) obrís sas pòrtas.
1996-97 : Entre octobre de 1996 e març de 1997, los presidents de Seaska, La Bressola e Diwan venon visitar APRENE, perque, eles an pas encara d’establiment d’aquela mena. Calandreta lor prepausa de montar un establiment de formacion en comun : Institut Superior de las Lengas de la Republica Francesa (I.S.L.R.F).