La Generalitat de Catalonha a atribuit lo prèmi Robèrt Lafont 2026 a Calandreta. Aquela distinction reconeis lo trabalh menat dempuèi de decennis pel nòstre movement en favor de l’ensenhament e de la transmission de la lenga occitana. Una reconeissença que fa onor a tota la comunitat calandreta.
Un engatjament collectiu reconegut
La jurada, presidida pel conselhièr de Politica Lingüistica F. Xavier Vila, a causit Calandreta a l’unanimitat demest quatre candidaturas. A volgut saludar son implantacion territoriala, la continuitat de son accion educativa e sa capacitat de recampar un collectiu larg a l’entorn de la lenga, en ligam amb d’autras entitats occitanas.
Lo conselhièr a tanben soslinhat la plaça que las calandretas donan a l’occitan : una lenga per apréner, mas tanben per crear de ligams, viure amassa e bastir l’identitat dels escolans.
Una remesa de prèmi en occitan
La ceremònia de remesa del prèmi se tenguèt lo dijòus 17 de setembre de 2026, entièrament en occitan. Presidida pel conselhièr F. Xavier Vila e presentada per la jornalista aranesa Ares Riu, aculhiguèt las intervencions de Joan-Loís Blenet, president de Calandreta, de l’occitanològ Jaume Figueras e de l’artista marselhés Rodin Kaufmann. Un moment de rescontre e de mesa en valor de la lenga e de la cultura occitanas.
Transmetre la lenga, bastir l’avenir
Nascut en 1979, lo movement Calandreta fa viure un projècte ont la transmission de l’occitan es al còr de l’educacion. Dins nòstres establiments associatius, laïcs e gratuits, l’immersion lingüistica s’assòcia a una pedagogia activa, noirida pels apòrts de Freinet e de la pedagogia institucionala. Parents, regents e amics de la lenga s’i engatjan amassa per far escòla, dins un esperit de cooperacion e de dobertura a las autras lengas e culturas.
Creat en 2010, lo prèmi Robèrt Lafont recompensa las personas e las entitats que se remarcan per la defensa, la promocion e lo raionament de l’occitan dins l’ensemble de son airal lingüistic. L’atribucion d’aquèl prèmi a Calandreta met a l’onor la fòrça d’un projècte collectiu de transmission.
Aquela reconeissença, la partejam amb los calandrons, las familhas, las còlas pedagogicas, los personals, los benevòls e totes los que fan viure Calandreta cada jorn. Es un encoratjament a perseguir nòstra mission : donar als mainatges la possibilitat d’aprener, de grandir e de bastir lor avenir en occitan.